أترككم مع مقتطفات من ديواني الاول المتفائل وضعتها تحت عنوان واحد هنا ( عيش )
——-——–————————–—————-———-
لرؤية الادراج بطريقة برنامج ادوب ريدر اضغط على الرابط التالي
والذي اشكر على الاهتمام به وصنعه الاستاذ الفاضل والاخ العزيز جدا علي مزهر ابو علاء صاحب القلب الجميل
عيش
هي حياه
يعني حياه
أو دُنياك
يعني تعيشها
ورغماً عنك
أو برضاك
راح تاخد منك
يمكن أكتر مابتديك
يبقى بسرعة
إلحق
إغلبها
إكبش منها بكل إيديك
إسرق ضحكة
إسرق حب
عيش بالطول والعرض
طُب
هد الأرض
إغضب برده
ما يخسرش
إزعل
عيط
كسر
هَبِد
علشان تهدا
ولازم تهدا
إوعى يا عم
تعوم فـ الهَم
كفاية دقيقة
وأخرج منها
بأي طريقة
غيّر قعدة
نُط وإعمل كام تمرين
قلِد شعبولَّا
وهات طقمين
ستين لون
أو مِنكمشين
ماهواش نافع؟
طَلَبِت بوم؟
شَغَلْ يلَّا يوتيوبَّاية
أو أغنية من إيَّاها
أُمال يعني إيه لزمتها
وبسلامتها تعبت روحها
وغنت فيها
وحتى ما خَلِت غير جزمتها
أُرقص
هيَّص
إجري
إتنطط
هبِل
شَقلَط
علِي الصوت ما تقولش داعيب
أو في ناس علينا رقيب
هيقولوا عبيط؟
طظ ومالو
حد فـ زعلك
قالك وصفة
تغيَّر نَكَدَك؟
حد فـ زعلك
قالك وصفة
تنعنش قلبك؟
يبقى فـ هِيصتَك
كبَّر مخك
خللي العالم
كله دا مِلكك
إوعى بإيدك تعشق غمك
إوعى بإيدك تخنق نفسك
لو يوم حتى يسيطر غِلَّك
دي لو ساعة تكون خسران
ساعة بساعة بتعمل يوم
يوم على يوم يزَوِد نحسك
تيجي تطلع
يجري يشدَّك
ويزيد همَّك
تلطم خدك
تخلع شَعرك
تمشي تصَوَّت
أنا المنحوس
أنا المنحوس
أنا دايما فـ الوحل بدوس
والناس تجري وتهرب منك
لو طالت راح تقطع رجلك
قلبك حتى يبقى حقود
لبسمة غيره فـ وشه حسود
ويا سواد بختك
علشان بختك
دعوة أمك
إللي إلِيك
تبقى عليك
مش إستسلمت؟
طيب موت
غامر
جازف
فكَّر
دبَّر
خليك أجرأ
لو بسكونك ياما خسرت
لازم قومتك تطلع أشطر
فيه إيه يعني هتخسر أكتر؟
وقعت؟
ومالو
نفَّض نفسك
تلمع أكتر
تقوى كمان
تصبح أكبر
صاحب ناس
كل الناس
وإفرض دايما حُسن النيَّة
مش هتعضَّك
ولا هتكون نملة وتنداس
كل عقولهم ويـَّا قلوبهم
يوم هتفيدك
وإيَّاك حتى بطفل صُغَيَّر
يوم تستهتر
نقطة فـ عقله هتكون أكبر
d984d988d984d98a